特技人柯受良喺1992年11月15號揸電單車飛越金山嶺長城，之後佢喺1997年飛越黃河、2002年飛越布達拉宮，亞洲「第一飛人」稱號當之無愧。

1992年柯受良飛越長城，距離係38米闊，同佢之前飛越過嘅80米大峽谷、100米碼頭、70米高速公路相比，長城嘅距離雖然較短，但一啲都唔容易。佢當日由長100米、坡度15度嘅臨時助跑台上開車，打橫飛越長城烽火台，再落到闊4米、高約20米、長50米、並無圍欄嘅台上。由於難度極大，據講香港嘅保險公司都唔受保。

咁點解要佢挑戰飛越長城呢？除咗為中國體育基金會籌款，據講仲有另外一個原因，話說當時有英國人想挑戰飛越長城，不過柯受良話「必須要由中國人第一個飛越長城」，仲話唔飛長城唔算英雄咁話，最終完成創舉，列入健力士世界紀錄。柯受良講過，長城係中華民族嘅驕傲，對於可以代表中國人首先飛越長城，佢感到非常自豪同開心。

原片嚟自網絡。