早前睇新聞，話位於浸大舊校區內嘅大學會堂將會拆卸，响新校區個邊興建一個新大學會堂，呢個獅子山下嘅九龍塘地標應該會同大家講再見。

大學會堂原名大專會堂，於1978年啓用，係浸會學院(浸大前身)校內一個舉行表演以及各項典禮嘅場地，後嚟浸會書院升格為大學，大專會堂亦更名大學會堂。可能年紀細啲嘅史友未必知，雖然AC Hall只係容納到千幾名觀眾，但以前好多有份量嘅歌手都响到開過騷，其中一個原因係响七十年代尾紅磡體育館未落成，大專會堂就成為香港其中一個主要藝術表演場地。另一個原因係話大專會堂近廣播道，唔少傳媒機構搞騷都貪佢夠近。講到當年响度開騷嘅巨星，嚟自台灣嘅鄧麗君以及日本嘅中村雅俊，都响呢度開過騷。

話時話，近年响網上睇到朋友分享嘅相，有啲幼稚園都响AC Hall舉行畢業典禮，果然識揀！


原圖來源：香港浸會大學網站