香港近排嘅天氣反復，有唔少同事病咗，坐阿史隔離嘅同事仲病到要連請兩日病假，阿史都戥佢陰功，然後對面嘅小鮮肉同事就無啦啦問阿史，點解陰功同無陰功嘅意思都差唔多嘅？

 呢個問題有啲複雜，首先，陰功本嚟係解陰德，即係暗中做好事積落嘅福氣，例如辛棄疾嘅《感皇恩》：「七十古來稀，人人都道。不是陰功怎生到。」不過，其實廣東話入面嘅「陰功」，同宜家普通話「陰功」嘅詞義差好遠，我哋宜家經常講嘅陰功，有「可憐、悲慘」嘅意思，亦有「做陰騭嘢、作孽」。而「無陰功」照計應該係「陰功」嘅反義詞，但實際上啱好相反，兩者嘅意思同用法都極其相似。有學者就認為，「陰功」其實就係「無陰功」嘅省略，亦都有學者認為，「陰功」其實就係一種反話，係指無陰德咁解。

無論係陰功又好，無陰功又好，大家都要注意保重身體，唔係病咗就真係無陰功咯。

原圖：網上圖片