上個月TVB頒獎典禮上面，煒哥陳煒雖然失落視后，但就攞到「最受歡迎電視女角色」，都算係觀眾對佢演技嘅一種認同。不過，原嚟煒哥都曾經被TVB blacklist。

煒哥一開始已經係冠軍級人馬，佢1996年參加亞洲小姐獲得第一名，之後被亞視力捧做當家花旦之一，亦都接咗唔少廣告，最高峰果陣，煒哥一年接成七、八個廣告。當中最深入民心嘅，就係果個「宜家去街，連香水都唔洗搽」嘅沐浴露廣告，令唔少人覺得煒哥主要係賣性感。煒哥鍾意拍戲，只不過後嚟亞視自家製嘅劇集越嚟越少，煒哥覺得無癮就離開亞視。而喺亞視期間，煒哥無好似其他一線演員咁被TVB挖角，原因聽聞係TVB覺得煒哥好亞視feel，同百萬富翁主持人陳啟泰擺埋一齊，就係亞視雙陳，所以就被TVB blacklist。而自從煒哥喺2008年同台灣商人結婚之後，就開始息影。

直至2012年，煒哥復出並加入無綫。無拍戲幾年，煒哥初初入大台果陣都覺得戰戰兢兢，不過有麝自然香，煒哥有樣又有演技，屢屢獲無綫重用甚至擔正，例如《果欄中的江湖大嫂》咁，事業可謂一帆風順。不過，煒哥嘅婚姻生活就唔太順遂，原嚟喺加入TVB之前，煒哥已經因為同丈夫嘅生活重心唔同而離婚。但煒哥無悔重新復出拍劇嘅決定，佢好開心宜家可以打破以往嘅性感形象，最重要嘅係，有人認同佢識做戲，努力總有回報。

原圖嚟自網絡。