就算近年嚟多咗迪士尼樂園呢個競爭對手,海洋公園依然係好多香港人心目中No.1嘅主題公園。今日係海洋公園42歲生日,雖然阿史唔知今年仲會唔會再加價,但原來1977年1月10號海洋公園啱啱開幕果陣,成人門票係賣15蚊,小童票7蚊,仲好快售罄添。而只係遊黃竹坑花園嘅遊客當然抵啲,成人收5蚊,兒童2蚊。

海洋公園嘅開幕儀式係由時任港督麥理浩主持,佢隨後仲親身試坐吊車。呢種連接黃竹坑到南朗山嘅吊索纜車系統,除咗可以帶遊客上落山之外,仲可以俾遊客欣賞深水灣同南朗山嘅海景。吊車可以話係海洋公園嘅一大特色,佢同公園嘅年紀一樣大。阿史細個每次去海洋公園起碼都要坐返3﹑4轉先過癮。初初海洋公園嘅重心在於海洋保育,重點介紹海濤館、海洋館、海洋動物表演館,宜家深得大人細路歡心嘅機動遊戲喺當時反而係其次。

原圖為1977年嘅海洋公園同海洋館。