宜家TVB《皓鑭傳》播到咁上下，阿史開始有啲好奇，究竟皓鑭身邊幾時會出現嫪毐呢號人物呢？講起嫪毐（音路藹），好多人應該第一時間就諗起《尋秦記》嘅江華，無錯，就係佢喇。

根據司馬遷嘅《史記》所載，秦始皇生母趙姬喺贏異人死後繼續同舊情人呂不韋私通，但隨住嬴政慢慢大個仔，呂不韋驚會被嬴政發現自己同趙姬嘅事，於是向趙姬獻上嫪毐。嫪毐原本係呂不韋嘅門客，為咗可以名正言順咁入宮做趙姬面首，嫪毐扮成太監隨侍趙姬左右。因為嫪毐身體某部份異於常人，床上功夫非常了得，深受趙姬寵愛，被封為長信侯，賞賜十分豐厚。嫪毐屋企唔單止有成幾千個奴僕，仲有千幾個門客，對外仲宣稱自己係秦始皇嘅「假父」。

後嚟趙姬有咗嫪毐嘅骨肉，為咗掩飾呢單醜聞，特登搬去雍地住，順便生咗兩個仔。唔單止係咁，嫪毐仲同趙姬密謀，等秦始皇死後就由自己嘅仔嚟繼位。公元前238年，有人向秦始皇告發嫪毐係假太監，仲同太后趙姬有姦情，連仔都生埋。秦始皇知道之後梗係嬲到震，下令叫太后移居雍地，殺咗兩個同母異父嘅細佬之餘，仲誅埋嫪毐三族，連幫太后趙姬求情嘅官員都無得留低。

圖為《尋秦記》嘅嫪毐同秦始皇母親朱姬。原圖嚟自網絡。