【講開有段故】秦始皇出兵三十萬北伐匈奴點解最尾都吞併唔到匈奴？
秦始皇喺西元前221年就為秦國實現「囊括四海，併吞八荒」嘅願景，成功建立中國史上第一個統一嘅王朝。本來經歷過多年嘅戰亂，幾強大嘅王朝都需要休養生息，但秦始皇就反其道而行，唔單止對內進行大規模嘅基建，而且仲出動三十萬秦軍北擊匈奴。但到底點解用咗咁龐大嘅人力物力之後，秦朝唔單止唔能夠吞併匈奴，甚至仲需要修築長城以作防備呢？阿史今次就同大家講一講啦！
雖然話秦始皇發動三十萬秦軍北伐匈奴，但實際上呢場戰爭近乎係冇乜得益。先喺成本方面嚟講，喺冇漕運嘅情況之下，如果由長安出發去為等部隊運送一石糧草糧食嘅話，成本其實係相當於一百九十二石嘅價值，呢個數目仲誇張過攻打六國時運送糧食嘅成本，即使去到漢朝衛青、霍去病嘅時期，糧食運輸路途遙遠嘅問題都未得到解決。
行軍打仗糧食就日日都需要，但仗又係咪可以真係日日有得打呢？喺北伐匈奴嘅過程中，軍隊經常都係面對住「皆不見匈奴一人」嘅情況，而部隊仲經常因為喺大漠中迷路而死傷慘重。唔單止咁，即使秦軍可以成功打下匈奴，但佢哋所在嘅領土並唔能夠發展農耕，相反為咗防止佢哋作亂，秦國仲需要出錢養活匈奴，完全唔符合成本效益，所以最後都冇法吞併匈奴。
原圖嚟自網絡