喺2002年7月25日，屯門安定邨發生一宗恐怖嘅殺人案，一對分別9歲同4歲嘅小兄妹身中130刀身亡，而兇手居然係照顧佢哋嘅保姆。點解佢會狠下殺手？原來一切一切，都係糾纏响個「情」字上面。

小兄妹小渝同琳琳嘅媽媽陳鳳儀（阿儀）大約30歲，自從中五畢業起幫媽媽打理菜檔，之後做蔬菜批發。2000年嘅某一日，阿儀上深圳攞貨嘅時候，認識咗沈默寡言嘅陳遠林。陳遠林對大佢六年嘅女方一見鍾情，開始單戀阿儀。

而小渝同琳琳，就係阿儀分別同姓詹嘅前夫以及姓陳嘅前男友所生。當姓陳前男友「人間蒸發」之後，阿儀將對小兄妹交俾個女保姆照顧，但點知無幾耐個保姆被人揭發做黑工，拉咗。臨時臨急，阿儀為咗搵人照顧對小朋友，於是聯絡陳遠林。一開始陳遠林滿心歡喜，以為可以接近心愛嘅人，點知阿儀慢慢開始唔畀人工，又成日唔出現，最後陳遠林發現自己做咗「兵」，更犯下無法彌補嘅大錯。

陳遠林當日打電話聯絡阿儀，發現又收唔齊人工，居然先後用兩把刀殺死哥哥小渝，再將魔爪伸向妹妹琳琳。隔咗兩日之後，佢先向警方自首，原本佢都唔肯講點解要殺呢對小兄妹，後來警方查出佢銀包有張陳鳳儀嘅相，係由家中相簿所偷，佢就承認係因為對小兄妹發現佢想同陳鳳儀結婚，於是取笑佢「係乜新鮮蘿蔔皮」、「癩蝦蟆想食天鵝肉」等等。陳遠林聲稱係想用刀嚇佢哋，點知錯手殺死呢對小兄妹，但似乎陪審團唔接納佢呢個解釋，最終裁定佢謀殺罪成，被判終身監禁。

至於點解陳鳳儀要留低小兄妹俾外人照顧，原來係去咗同姓呂嘅男朋友同居，仲隱瞞自己已經有2個小朋友，直到出咗事，男方先知道來龍去脈。唉，感情事，何苦要連累兩個小朋友……

原圖取自網絡。