之前講到二戰結束時英國同中國為咗接收戰後香港嘅一啲矛盾，最後香港繼續成為英國遠東嘅殖民地。香港主權問題到咗七十年代開始又出現咗變化。响1971年，中華人民共和國取代中華民國嘅聯合國「中國」合法席位，之後中國常駐聯合國代表黃華就重申中國對香港同澳門嘅立場，認為香港同澳門係英國同葡萄牙搶佔返嚟，完全唔屬於通常殖民地範疇，最後响1972年11月8日，聯合國大會通過決議案，將香港同澳門响殖民地名單剔除，所以香港同澳門就同其他殖民地唔一樣，即係唔可以以殖民地身份獨立。

隨住文化大革命响七十年代末結束，中國响內政同外交方面都作出咗調整。另一方面，英國租借新界嘅限期就到，所以英國方面就希望就香港呢個歷史遺留落嚟嘅問題同中國進行交涉。1979年，時任港督麥理浩首度訪問中國，並首次向當時嘅國務院副總理鄧小平提出香港前途問題。