前排睇新聞見飛行服務隊請緊見習機師，咁不如今日就介紹吓飛行服務隊嘅歷史。其實十幾年前鄭伊健套《隨時候命》令大眾對飛行服務隊多咗少少認知，當大家覺得上直升機做嘢好正好開心，好似電視劇咁型仔嘅時候，有位空勤主任打破大家嘅幻想：機內環境其實又熱又震又嘈。

講返少少歷史先，飛行服務隊响1993年4月1日開始投入服務，係保安局轄下其中一支紀律部隊，負責執行搜索同拯救行動，前身係皇家香港輔助空軍。香港輔助空軍响1949年成立，初期由一班自願人士組成，輔助海上同陸上嘅搜索同拯救行動、撲滅山火同支援反走私行動等等。响1970年代，香港輔助空軍獲英女王伊利沙伯二世冠以「皇家」稱號，表彰佢哋嘅貢獻同重要性。

其後服務需求增加，皇家香港輔助空軍嘅成員逐漸由屬於公務員嘅永久僱員取代，接受紀律約束同軍事訓練。到咗1990年代，香港臨近回歸，「皇家香港輔助空軍」呢個名變得不合時宜，於是响中英聯合聯絡委員同意下，1993年改組為政府飛行服務隊，保留一切日常功能，繼續提供支援服務。

同其他紀律部隊一樣，飛行服務隊嘅工作同樣唔可以出錯，摸黑、大風、天氣惡劣等情況可以話係家常便飯，所以每次飛行同出任務，都係對生命嘅挑戰。不過當佢哋响直升機上俯瞰靚景、成功救到人，所得到嘅滿足感絕非筆墨所能形容。

圖為皇家香港輔助空軍，取自網絡。