英倫銀行尋日話，會以「電腦之父」、數學家圖靈作為50鎊新鈔票上嘅肖像人物，阿史諗起早幾年睇過一套改編自圖靈真實故事嘅電影《解碼遊戲》，由「福爾摩斯」影星班尼狄甘巴貝治飾演圖靈。戲入面講述圖靈喺二戰期間，同隊友研製解碼儀器，幫助英軍破解德軍情報、結束戰爭，但响戰後就因為性取向而被英政府入罪。究竟現實中嘅圖靈係個咩人？做咗啲咩重要貢獻而成為銀紙上嘅男人？

戲入面嘅圖靈係不擅交際嘅「書呆子」，但真實嘅圖靈其實並唔係咁嘅，雖然佢係有啲漏口，但親友都話佢為人風趣有善。圖靈1912年生於英國倫敦，細細個就已經展現對科學同數學嘅天分。圖靈喺16歲嘅時候已經睇得明愛因斯坦嘅《相對論》，後嚟以優異成績响劍橋大學國王學院畢業，再喺普林斯頓大學取得博士學位，1936年發表咗篇經典論文《論可計算數及其在判定問題上的應用》，提出著名嘅圖靈機模型，而圖靈機嘅理論為電腦嘅運算方式奠下基礎，所以唔少媒體稱佢為「電腦之父」。

响1939年，圖靈被英國皇家海軍招攬，喺軍情六處監督之下破譯德國U型潛艇响大西洋戰場所用嘅密碼，有科學家估計圖靈小組嘅工作，令盟軍提早兩年戰勝納粹德軍。

圖靈响1952年因為同性戀傾向，而被判「嚴重猥褻罪」罪成，判處化學閹割，令佢身心俱疲。兩年之後圖靈被發現死喺家中嘅床上，終年只有41歲，而佢死時旁邊有個咬過嘅蘋果，其後驗出含有氰化物，唔少人都相信佢係死於自殺。到咗2012年，圖靈誕辰百週年，有數萬人請願要求赦免，最終响2013年12月24日，英女王頒布赦免令，免除圖靈嘅罪名。

圖為50鎊圖靈新鈔、《解碼遊戲》劇照，取自網絡。