尋日講開李麗珊，一於再講多少少奧運嘅歷史先。喺1932年嘅今日，第十屆奧運會响美國洛杉磯舉行，而呢一屆奧運會亦係中國第一次派運動員參加嘅奧運。喺開幕禮上，短跑運動員劉長春持旗率領中國代表團入場，成員仲包括教練宋君復、領隊沈嗣良，以及劉雪松、申國權、托平等中國留學生及美籍華人。劉長春喺100米、200米短跑預賽中，排小組第五、六名，未能取得決賽入場券，但佢依然係中國第一位參加奧運會嘅運動員。之不過，原來中國決定派運動員參加呢一屆奧運會，係同偽滿洲國有關嘅。

話說响呢屆奧運會舉行之前，日軍入侵中國東北，建立偽滿政權，為得到國際社會承認，日方就諗住派出遼東運動員劉長春同于希渭，代表偽滿洲國參加奧運會。消息傳出之後，引嚟全國聲討，劉長春發聲明「偽報所言，純屬虛構謊言。我的良心尚在，熱血尚淌，豈能忘掉祖國而為傀儡偽國做牛馬。」國民政府知道之後，亦決定派劉長春、于希渭代表中國參加呢一屆奧運會，但因為日方阻撓，最後于希渭未能出發，得返劉長春一位運動員代表中國到美國參賽。

圖為劉長春參加奧運，取自網絡。