農曆七月，講返啲應景嘅電影先。阿史平時夜晚肚餓都會煮吓水餃做宵夜，不過當年睇完楊千嬅嗰套《餃子》之後，都唔係好敢食，有時真係好肚餓，都會一邊食、一邊諗起楊千嬅個樣，諗起都心驚驚。

《餃子》响2004年上映，改編自編劇兼作家李碧華嘅短篇小說《月媚閣的餃子》，由陳果執導，楊千嬅同梁家輝主演。楊千嬅喺戲入面飾演過氣女星艾青青，嫁咗俾梁家輝飾演嘅富商李世傑。但隨住年紀增長，艾青青外貌開始衰老，為咗挽回丈夫嘅心，於是佢就去咗媚姨（白靈飾演）嘅店鋪，食用人胎製成嘅餃子，回復青春。

起初艾青青食人胎餃子都有啲抗拒，但見到有效之後，就開始泥足深陷，最後媚姨因為要著草返內地，無人整餃子俾艾青青食。於是佢就出錢買丈夫情婦肚入面嘅私生子，自己包餃子、自己食，完全入曬魔咁款，諗起都心寒。

圖為《餃子》劇照，取自網絡。