以前讀書嗰陣，班會入面都一定要有個財政先成事，點解？歌仔都有得唱，「成日要錢多(錢錢錢錢 錢錢錢錢)」，就知搵錢同管錢有幾咁重要。唔單止你同我，當年孫中山搞革命，同樣係「成日要錢多」，需要有個財政幫手管錢，而廖仲愷就係孫中山嘅「財爺」喇。今日係廖仲愷逝世94周年，等阿史帶大家回顧吓佢嘅生平事蹟。

廖仲愷祖籍廣東惠陽，1903年同妻子何香凝去日本留學，特登去拜訪孫中山，從此兩夫婦就加入同盟會，跟隨孫中山搞革命。1911年，廖仲愷喺武昌起義之後擔任廣東都督府總參議，兼理財政。辛亥革命之後，廖仲愷喺任廣東都督總參議、總統府財政部長兼廣東省財政廳廳長期間，迅速解決咗廣東財政混亂問題，維持廣東貨幣嘅信用同穩定金融市場。

喺1916年嘅反袁、護法運動入面，廖仲愷喺籌措革命經費亦起到關鍵作用。除此以外，廖仲愷仲通過借外債嚟籌辦廣東銀行嚟改善幣制，努力推行地價稅契法案，通過改革地稅嚟增加財庫收入，從而實現同盟會「平均地權」嘅土地國有政綱。1925年今日，廖仲愷喺廣州遇刺身亡，至於策劃刺殺佢嘅元兇係邊個，到今日依然係個謎。

原圖嚟自網絡。