上個星期娛樂圈可以話係一片愁雲慘霧，除咗全能音樂人黎小田過身，有「粵曲王子」之稱嘅鄭錦昌亦都離開咗，實在令人惋惜。諗起兩年前鄭錦昌嚟香港開告別演唱會嗰陣，阿史仲陪史媽去捧過場，估唔到果次係阿史最後一次見到佢。

鄭錦昌因自幼家貧，迫於無奈年紀小小就要出社會做嘢，受同事影響而愛上唱歌，於是放工之後就去學唱粵曲，之後仲參加過麗的呼聲演聲會添。可惜，初次登台嘅鄭錦昌因為太緊張，表現大跌watt，如果唔係大家可能仲可以早啲聽到鄭錦昌嘅靚聲。不過，好彩鄭錦昌並無因此放棄，上世紀60年代，鄭錦昌喺馬來西亞憑一曲《鴛鴦江》紅遍東南亞。

1973年，得肥姐沈殿霞引薦，鄭錦昌得以喺《歡樂今宵》同功夫巨星李小龍合唱《唐山大兄》。結果，就憑住呢首歌，鄭錦昌喺香港打響名堂，佢嘅金曲仲包括《新禪院鐘聲》、《馬永貞大戰精武門》、《秋月》等，唔少都家傳戶曉。

圖為鄭錦昌、沈殿霞、李小龍合照，原圖嚟自網絡。