後生啲嘅史友對於林保全呢個名可能無乜印象,但林保全把聲就真係幾代香港人由細聽到大。保全叔呢位資深配音員响2015年1月2日,即五年前嘅今日離開咗大家。

保全叔响1971年正式投身配音事業,佢入行個陣就加入無綫電視配音組,成為資深男配音員譚炳文同埋丁羽嘅徒弟。做咗足足二十年先轉會去亞洲電視配音組,跟住到1993年8月返無綫電視配音組,一做就做到63歲。

唔講唔知,雖然保全叔把聲深入民心,但其實佢一開始並唔係想做配音員,而係想為飛機師。佢嘅童年响澳門度過,中學嘅時候開始接觸話劇,後尾因為睇咗由姜中平配音嘅電視劇《泰山》,發現原來自己對配音都有興趣,就開始寫信去無綫電視自薦,就咁加入咗無綫電視配音組。

圖片來自網絡