上次講起啟德機場喺1936年3月24日開始提供民航服務，為香港民航業揭開新一頁。不過香港嘅第一次飛行，就要數到去1911年嘅飛行家查理斯．溫德邦（Charles Van den Born）。而家赤鱲角機場離境大堂上面嗰架舊飛機，就係參照溫德邦當年用嚟喺香港飛行嘅費文型（Farman）雙翼飛機所仿製。

喺1903年，美國萊特兄弟成功操控動力飛機「飛行者一號」飛行之後，全球掀起咗飛行熱，有唔少飛行家都希望成為各地嘅飛行先驅。喺1911年1月，美國嘅托馬斯．鮑德溫（Thomas Scott Baldwin）帶埋三架「紅魔鬼」雙翼飛機嚟香港，諗住喺快活谷馬場試飛，但遭到港英政府以違反飛行條例為由拒絕，無奈之下放棄計劃。

喺同年2月28日，來自比利時嘅溫德邦嚟到香港，申請喺快活谷馬場試飛，同樣遭政府拒絕。但溫德邦無氣餒，喺「遠東飛船會」幫助之下，成功游說政府批准喺新界試飛。溫德邦最後選擇咗喺沙田火車站附近（現時沙田大會堂一帶）飛行，並响3月18至20日、25至27日兩個週末舉行飛行表演。呢次表演非常矚目，喺3月18日2點首場飛行表演當日就有唔少嘉賓到場觀賞，包括港督盧吉伉儷，不過「天氣不似預期」，當時沙田風力太強，因為無法安全飛行導致表演延遲，等咗2個幾鐘後，盧吉伉儷同唔少嘉賓都走先。直至5點左右風力逐漸減弱，溫德邦終於可以起飛，成為香港嘅第一次飛行。

圖為香港第一次飛行、溫德邦，取自網絡。