呢枝笛大家又識唔識吹呢？

見到呢張圖，相信唔少史友手指都會有啲反應，事關呢枝笛係香港學生音樂堂需要學到嘅樂器，無論小學定中學都會用得著。

呢枝笛香港普遍會叫做牧童笛，又有人會叫做直笛，最初係用木製成，所以又屬於木管樂器。牧童笛笛身有八個窿，而最尾兩個細窿響尾部再分成兩半音，原理上就係通過口吹氣入笛嘴，氣流撞到尖板產生空氣振盪而發音，笛身上嘅窿就係用嚟控制音高。一般牧童笛就有兩種指法，分別係「德式指法」同埋「巴洛克式指法」，至於用邊種指法就視乎直笛係邊款。

如果以為牧童笛係新派樂器咁就錯喇！現存最古老嘅牧童笛係14世紀所生產，而更久遠嘅西洋畫上面都有牧童笛嘅出現。講開又講，雖然阿史都學過幾年點吹笛，但依家基本上就只係記得C、D、E、F幾個基本音，仲記得當年果啲超高難度嘅高音，真係會手指抽筋。