「四環九約」係九個失約之地？

阿史冇耐之前就同史友們介紹過七塊港島嘅界碑，而當時嘅政府就係想通過用呢七塊界碑去標示港島西北部，直到二次世界大戰之後先停用。呢個範圍就係華人口中所流傳嘅「四環九約」。

「四環九約」當中嘅「四環」就好簡單可以理解成上環、中環、西環同埋下環，即係今日嘅昔日美利操場去到銅鑼灣一帶；至於「九約」就係四環之內嘅地方，但就唔係一個固定嘅概念，「九」亦都只係一個虛數，唔同年代對呢啲地方都有唔同嘅版本，最多嘅時候曾經出現過「十一約」。所謂嘅「九約」就曾包含過堅尼地城、西環、石塘咀、西營盤、上環、太平山、中環、下環、灣仔、寶靈頓、黃泥涌、掃桿埔、東角、高士威、大坑同埋北角等。

而提到「四環九約」就流傳住一個失約嘅故事：相傳有一位少女每日都要由下環去到堅尼地城為佢喺屠房做嘢嘅爸爸送飯，而當時上環就有一位待應鍾意咗呢個女仔，並且喺四環入面嘅九個唔同地方約見呢個女仔，但就因為各種原因而失約，於是呢九個地方就被喻為係失約之地，但當然呢個聽落都只係個故仔啦！