圓洲角王屋村有間古屋？

雖然1970年代沙田一帶要發展成新市鎮，有唔少地方都大興土木並且進行填海工程，但當中仲係有唔少珍貴嘅古蹟保留落嚟，今次阿史想介紹嘅正係一個昔日見住圓洲角興衰嘅地方，王屋村古屋。

王屋村以前真係一條村嚟，位於沙田區圓洲角東南面，據講係由一對嚟自廣東興寧王姓夫婦喺清乾隆年間建立，至今大家今日可以見到嘅王屋村古屋，就係由佢哋嘅族人王清和喺1911年左右興建嘅。今時今日大家去到王屋村可能覺得唔就腳，但其實喺19世紀嘅時候，圓洲角係有住地理上嘅優勢，來往廣東同埋九龍嘅商旅都會經呢個地方，並且會喺度休息同埋停留。亦都因為呢個原因，令到圓洲角係當時嘅交通樞紐，各項商旅業務都喺度應運而生。

去到1970年代，因為沙田新市鎮嘅發展，沙田海急速填土，圓洲角島狀外貌都被改變，而圓洲角及沙田圍嘅土地都被政府收購，王屋村就得返古屋被保留落嚟，並且喺1989年12月22日列為香港法定古蹟。