對唔少鐵迷嚟講，2007年嘅今日係一個好特別嘅日子，事關香港地下鐵路同埋九廣鐵路喺呢一日正式合併。

喺1975年9月26日，當時港府就成立咗地下鐵路公司，並且係以全資擁有嘅方式持有；至於九廣鐵路嘅歷史就更加長，可以追溯到1910年，但原身運作嘅九廣鐵路局就喺1982年12月24日改組成政府全資擁有嘅九廣鐵路公司。咁問題嚟喇，由於兩鐵係分開管理，好多規劃都未必可以配合到，於是坊間就人提議政府，不如將兩鐵合併啦，之但係呢個研究喺80年代就胎死腹中。

時間再去到1999年6月，當時地下鐵路公司宣布改組為地鐵有限公司，並且喺2000年正式私有化，於是港府亦都喺2000年嘗試邀請地鐵有限公司及九廣鐵路公司就《鐵路發展策略2000》規劃作出討論。只係喺會議上兩間公司喺沙中線嘅問題上都拎唔到共識，呢件事就被視為係兩鐵合併嘅起因。

2004年2月，政府宣布邀請地鐵公司同埋九鐵公司就擬議合併一事開始進行商討，當中就談及唔少細節，好似票價調整機制、取消轉乘車費等等。去到2006年4月11日，政府就同地鐵公司達成兩鐵合併共識，行政會議亦通過兩鐵合併方案，開始兩鐵合併安排，喺2007年12月2日，兩鐵就正式合併喇！

原圖嚟自網絡