日軍提早佔領城門高地

尋日就同史友們講到喺1941年嘅12月8日，日軍就正式喺廣東南方進攻香港，展行「南方作戰」嘅C作戰。當時日軍第38師團越過深圳河，進軍新界，向住英軍嚴防嘅醉酒灣防線進攻。

喺發動攻勢之前，其實日軍曾經計劃過以十日時間攻克九龍，再用三日時間佔領埋港島，之但係呢個計劃就被當時嘅日軍現場指揮打亂晒。喺12月8日嘅下午，當時土井定七大佐率領第228聯隊抵達深圳，並且喺第二朝去到香港針山、草山視察城門戰線。結果就發現當時英軍嘅兩個高地防守相當薄弱，結果當日下午約有500人嘅第3大隊就發動攻勢進入鉛礦坳，突襲城門碉堡。

負責防守嘅皇家蘇格蘭營喺雨勢之下，未能察覺到日軍已經渡過主壩，去到晚上日軍兵分兩路先後佔領咗兩個機槍堡同埋砲兵觀測所，喺寡不敵眾之下，當時英軍只好投降。雖然呢次作戰日軍係比原定計劃早咗好多，但其實就係230聯隊違反軍令之下先造成，所以當年嘅戰功就記咗畀先攻入觀測所嘅第10中隊隊長若林東一，「若林隊佔領」五字，今時今日都仍然可以喺城門碉堡見得到。