政府公布發展屯門新市鎮計劃

對住喺新界西部屯門新市鎮嘅市民嚟講，今日都係好特別嘅一日，事關喺1973年嘅今日，政府就正式宣佈會發展屯門新市鎮計劃。

屯門新市鎮，以前又叫做青山新市鎮，主要嘅範圍面積達到3,259公頃，由青山灣填海區到青山同埋九逕山之間谷地，再去到鍾屋村、小欖、踏石角等等，都係屯門新市鎮嘅範圍，當中好大部分都係填海土地。

咁點解好地地都要去到新界西部整個新市鎮呢？喺二戰之後，戰後移民以及嬰兒潮等等嘅關係，令到人口一時暴增，60年代香港就已經有成420萬人口，市區亦都變得相當擠迫。於是，當時港府就決定積極推行分散市區發展政策，喺1965年就將屯門納入研究，並且喺1973年嘅今日宣佈要發展呢個地方，並且投入超過60億配合十年建屋計劃同埋道路網絡興建。時至今日，屯門新市鎮人口就已經達到接近50萬。