「眾裡尋他千百度，驀然回首，那人卻在，燈火闌珊處。」呢一句，相信好多史友都考會考嘅年代都背過、讀過或者聽過，佢嘅作者就係同蘇軾並稱「蘇辛」嘅豪放派詞人代表——辛棄疾。

辛棄疾生於金國，鄉下喺山東，由祖父撫養長大，祖父自幼就向佢灌輸抗金復宋嘅概念。辛棄疾年紀細細就踏上咗抗金之路，加入抗金義軍，之後仲同宋廷嘅正規軍配合擊退金軍。後嚟辛棄疾等人奉表歸宋，雖獲宋高宗召見授予官職，但宋廷一直都唔信任佢。加上之後辛棄疾捉拿叛徒張安國一事，名動一時，令宋廷忌憚，委任佢為江陰簽判，辛棄疾於是一直居住喺南方，不再北上。「了卻君王天下事，贏得生前身後名。可憐白髮生！」依兩句係辛棄疾嘅夢想，亦係佢念而不得嘅夢。

辛棄疾空有一腔抗金熱血，但就一直被閒置或做啲無關緊要嘅官。不過，佢依然不斷上書獻策，《十論》、《美芹十論》同《九議》就係佢寫嘅政論文章，但朝廷一直都無採納佢嘅建議。佢晚年開始過起隱居生活，直至1203年宋廷宰相韓侂胄想利用辛棄疾嘅名望去震懾金兵，任命辛棄疾為紹興府知府同浙東安撫使。辛棄疾欣然就任，但就被人彈劾而去職，南宋只好向金國求和，但金國要求南宋將韓侂胄嘅人頭送到金國先應承議和，韓侂胄再次請辛棄疾出山，但果陣辛棄疾已經60幾歲，且病重，實在有心無力。佢臨死前都無機會一展抱負，最後「抱恨入地，齎志以歿」，終年68歲。