近年嘅南韓總統，下場大多令人唏噓，包括盧武鉉。佢係南韓史上首位被彈劾嘅在任總統，卸任之後，因為受到貪腐醜聞影響，响9年前嘅今日跳崖自殺。

盧武鉉家境清寒，靠艱辛自學及發憤圖強成為律師，其後更勝出選舉，2003年就任南韓總統，並倡導清廉政治。政策方面，佢繼承前總統金大中嘅「陽光政策」，2007年徒步越過三八線，會晤當時北韓最高領導人金正日，並簽署宣言，為兩地和平發展帶來曙光。

佢上任總統後第二年，3大在野黨向國會遞交彈劾議案，理由是盧武鉉陣營响2002年底總統競選期間，收取非法政治資金等。當時在外遊歷嘅文在寅，得知消息後立即趕返南韓，為盧武鉉辯護，最終盧武鉉脫罪，完成任期。

不過，盧武鉉卸任之後，繼續被貪腐醜聞纏繞。佢被揭發任職總統期間，家人收受幾百萬美金嘅賄款，社會傳言四起。盧武鉉自殺前一個月，檢察廳以疑犯身份傳召佢問話超過13小時。接受問話前，他承認屋企人收過錢，但他當時並不知情。

2009年5月23日，盧武鉉响住所附近嘅「貓頭鷹岩」跳崖身亡。佢响遺書表示，「這段時間實在太累了，也連累了很多人」，但他堅持自己係清白，相信歷史會還佢一個公正評價。

圖片來源：網上圖片