喺21年前嘅今日，即係1997年5月14日，香港發生轟動一時嘅秀茂坪童黨燒屍案。當時花名叫阿雞嘅陸志偉，有一班童黨朋友，佢見到有個弱智男子陳木清被班童黨毆打，於是叫陳木清報警。之後有人篤爆，阿雞就被人話係「二五仔」，十幾個童黨就對阿雞拳打腳踢，又拎鐵通之類嘅硬物毆打佢，更加用「人肉打樁機」嘅方式將佢成個人倒吊，係咁樁個頭落地，最後阿雞失救而死。

之後班童黨將阿雞嘅屍體拖去附近工地焚燒，然後棄置垃圾房，最後被送去堆填區。事件其後被目擊者陳木清揭發，警方陸續拘捕呢班童黨，但阿雞嘅遺體已經送往堆填區搵唔返，最後喺其中一個童黨轉做污點證人下，高院裁定十三個被告入面，六人謀殺罪成，判終身監禁，其餘七人就傷人或誤殺等罪成。六名謀殺罪成嘅童黨之後上訴，其中一人改判嚴重傷人，其餘五人改判有期徒刑。

點解呢單案咁多人知？除咗因為班童黨嘅行徑太殘暴，亦因為單案之後被改編拍成電影《三五成群》，當中有句對白好出名，令唔少人關注呢套電影同單案。