大家印象中最難食嘅飛機餐係食啲咩？七八十年代，有香港企業家响內地搭飛機，發現空姐遞過嚟嘅食物係凍冰冰嘅，同機有香港人忍唔住話，「點解我哋唔可以成立一間航空食品公司，去改變依種狀況？」作為有商業頭腦嘅企業家，一於打鐵趁熱，著手設立第一間中外合資企業——北京航空食品有限公司，獲得註冊編號001，而背後嘅「001小姐」，就係伍淑清。

伍淑清係「西餅大王」、美心集團創辦人伍沾德嘅長女，係最早北上嘅香港企業家。1979年《中外合資經營企業法》出爐，佢先帶隊到內地考察，之後同爸爸搵中國民航總局傾合作，齊齊做航空食品。

响並無先例嘅情況之下，雙方一個月就傾咗三次，過程好漫長，因為溝通有困難，「我地唔識講普通話，用紙筆溝通寫繁體字，對家有一個人識少少廣東話，幫雙方溝通」。過程中，民航總局將件事講咗畀鄧小平聽，據講當時鄧小平回應：「伍先生懂不懂做麵包？懂的話便快批給他！」响鄧小平直接支持下，伍氏父女喺北京開創中國第一家航空食品供應公司。

要做第一，梗會面對唔少難關，好似有外籍廚師唔願意到內地等，不過機會係留畀有準備嘅人。當1980年合資嘅航空食品公司獲得註冊批准前，伍淑清已經投資咗五百萬，從海外訂購所需嘅機器，等批文到手嘅第二個月，公司已經開始生產。

後嚟，上海開始飛國際航班，不過航空配餐樓嘅廁所唔符合衛生標準，為確保衛生同食物質素，伍淑清從香港空運兩個廁所去上海，包括風筒、鏡等全部配套，甚至請埋香港工人過去拆咗原本嘅廁所，安裝新嘅。