話說公司呢排嚟咗位新男同事，個人生得尚算端正（深得公司嘅女同事青睞），但就有個壞習慣，就係中意「un腳」！阿史有次開會坐佢隔離，阿史隻手一路寫，佢隻腳一路「un」，張枱就一路震，阿史啲字就一路斜，認真難頂。

 

「un腳」書面語係抖腳，但究竟「un腳」個「un」字點寫呢？正確寫法係䟴，讀作ngan3，讀音有啲似我啲平時嘅英文發音「un」。䟴喺《說文解字》解：「動也」，佢同「震」、「振」嘅音義相似。

 

雖然之前有研究話䟴腳可以促進下肢嘅血液循環，對久坐有益，但史媽以前成日同阿史講：「人搖福薄，樹搖葉落」，加上䟴腳仲有機會影響到人，所以喺公眾地方都係少䟴為妙。