今個星期講咗唔少孫中山同辛亥革命嘅歷史，諗諗下原來香港都曾經播過同孫中山有關的電影，包括喺1993年由溫拿樂隊主演嘅《廣東五虎之鐵拳無敵孫中山》，紀念溫拿成立20年。同劇仲有黃秋生、陳法蓉、苑瓊丹、梁家仁等演員，加埋啲爛gag情節，真係好有導演李力持嘅風格。

除咗人物原型之外，情節上真係無咩歷史可言，不過套戲勝在搞鬼，例如溫拿將封密函砌錯咗，原本係叫孫中山小心力王，點知變做「小心鐵拳無敵孫中山」，仲有首唱到街市有人著火嘅插曲，啲歌詞仲好搞鬼，「打通港九，有自己兵工廠，心口碎石百零磅」、「但願自己識蕭芳芳」，聽一兩次都識唱。至於演員方面，最頂癮嘅莫過於黃秋生同苑瓊丹，入型入格。套戲出街之後，「鐵拳無敵孫中山」仲成為二次創作嘅題材添。