唔知大家有無睇過1993年上映嘅《舒特拉的名單》（Schindler's List）？呢套戲就係根據工業家舒特拉嘅事蹟而改編嘅。舒特拉原本係捷克斯洛伐克（捷克同斯洛伐克嘅前身）嘅公民，喺1936年加入德國納粹嘅軍事情報局。後嚟因為從事間諜活動被捕，之後根據《慕尼黑協定》，作為政治犯獲釋。舒特拉獲釋之後，喺1939年正式加入納粹黨。

舒特拉於1939年同猶太會計師斯特恩開咗間工廠叫「德國搪瓷製品廠」。舒特拉開廠嘅原意係賺錢，請猶太工人都係因為佢哋嘅人工遠遠低於波蘭人，後嚟眼見納粹德軍迫害猶太人，就下定決心拯救佢哋。起初工廠得7個猶太工人，期間佢將一批有一批嘅工人送入工廠，納入自己嘅羽翼之下，喺1944年最高峰時期，佢請咗成1000個猶太工人，保護佢哋免遭驅逐同處死。但後嚟舒特拉需要向納粹軍官送去更多嘅賄賂，甚至要通過黑市買貴重禮物送俾佢哋，先能夠保護工人嘅安全。

利森係被列入「舒特拉名單」上最細嘅猶太人，當時只得13歲。佢同屋企人响舒特拉嘅工廠入面每日工作12小時，但舒特拉見佢比較瘦，會分多份嘢食畀佢。利森嘅媽媽同女親戚有次被捉上火車，即將被送去集中營，舒特拉親自出面阻止，鬧納粹守衞「你地想對佢哋做咩？佢哋係我嘅人。」當時舒特拉嘅所有積蓄差唔多都用晒去安置、救濟猶太人，以至於喺二戰結束後，佢幾乎一貧如洗，反而調返轉頭要猶太人接濟佢。

舒特拉1949年移民去阿根廷，但佢經營嘅養殖場、水泥廠等生意都毫無起色，依舊靠佢以前救過嘅猶太人嘅資助嚟支撐佢嘅生活。1974年今日，舒特拉逝世，享年67歲。佢嘅遺體安葬係耶路撒冷嘅錫安山，係唯一一位葬喺呢個聖地嘅前納粹黨成員。1963年，以色列授予舒特拉「國際義人」稱號，以表彰佢喺二戰期間拯救猶太人免遭大屠殺嘅功勳。

左圖為舒特拉同倖存者Ludmila Pfefferberg合照。右圖為真正嘅「舒特拉的名單」。網絡圖片