喺1740年嘅10月，荷屬東印度嘅巴達維亞（即係而家嘅印尼雅加達）發生慘絕人寰嘅紅溪慘案，造成近萬名華僑死亡。

話說喺18世紀初，巴達維亞係一個有10幾萬人居住嘅城市，當中有近2萬人係華僑，從事工匠、飲食、製糖、釀酒零售等行業，當時有荷蘭人開始覺得啲華僑威脅到自己利益，於是就開始限制同排斥佢哋。喺1740年，當地盜賊四起，警方捉到嘅賊多數都係黑衫黑褲嘅華人，於是當局就下令，只要見到黑衫黑褲嘅華人就一律捉拿，並將佢哋流放到錫蘭等地做苦力。當時流傳，流放途中有好多華僑被殺或者虐待至死，於是9月嘅時候就有幾千個華僑喺市郊聚集，諗住反抗。

點知有叛徒告密，荷蘭軍隊好快就採取措施鎮壓，又以搜查軍火為名，自10月9日開始一連幾日搜捕城內嘅華僑，不論男女老幼、病人定係囚犯，總之見到就殺。當時華僑主要生活喺紅溪河附近，呢場屠殺令河流部份位置被遇難者遺體堵塞，河水幾乎被染成紅色，所以呢次屠殺又稱為「紅溪慘案」。