上星期嘅倫敦蘇富比拍賣會，英國街頭藝術家Banksy幅畫作「Girl with a Balloon」於即場「被碎」，話題性十足。其實全球多地經常舉行拍賣會，而新中國响1992年今日，亦辦咗首次國際拍賣會，當時拍賣品嘅成交價到底如何？

嗰次拍賣會喺北京21世紀飯店舉行，由北京廣告公司、北京對外文物交流中心同荷蘭國際貿易諮詢公司聯合主辦，主槌嘅係被稱為「香港第一槌」嘅胡文啟。拍賣品包括中國瓷器、金銀銅器、珠寶玉器、木器鐘錶、書畫郵品、紡織品、煙壺、汽車共8大類，合共超過兩千件。拍賣會總成交價為235.1萬美元，同主辦方預計嘅500萬連一半都唔夠。

92年嘅拍賣會同樣話題性十足，當時大眾對拍賣未太了解，會上第一件拍賣品經過十輪叫價，以1.05萬美元落槌，好多人以為成交咗，點知後嚟發現嗰件戰國轂紋壁因未去到1.1億美元底價，被賣家收回，搞到唔少買家滿腦黑人問號。