尋日提到二戰期間拯救大批猶太人嘅工業家舒特拉，肯定要講埋以佢做藍本、由著名導演史蒂芬史匹堡拍攝嘅電影《舒特拉的名單》。

史匹堡係猶太裔人，拍過唔少受歡迎嘅電影，而1993年上映嘅《舒特拉的名單》，令佢第一次奪得奧斯卡最佳導演，响佢嘅心目中自然份量十足。回想當年，史匹堡望完劇本之後好感動，好想拍，當時拍緊《侏羅紀公園》嘅佢，為咗唔好錯過於波蘭冬季嘅拍攝機會，佢唯有踩盡油門，一邊飛去波蘭拍攝《舒特拉的名單》，一邊用一啲都唔平嘅衛星通訊，同加州嘅特效公司溝通，呈現出暴龍追吉普車嘅刺激畫面。

拍《舒特拉的名單》前，史匹堡話佢未拍過咁嚴肅嘅電影，又驚觀眾唔相信套戲係由真人真事改編，所以臨時決定加入最尾一幕——獲救嘅猶太人同後代齊齊去到舒特拉墳前放石頭，以示悼念及感恩。沉重嘅劇情，連演員都難以招架。拍完集中營澡堂嘅一幕，有兩個後生嘅以色列演員情緒崩潰，三日都拍唔到戲，史匹堡都忍唔住，話場戲係佢導演生涯之中「最痛苦嘅一日」。

睇過嘅觀眾應該記得，戲入面有個紅衫妹妹，响黑白調嘅畫面入面非常凸出，原來妹妹拍攝時只係得三歲，佢同史匹堡約定，等18歲先睇齣戲，點知妹妹11歲就睇咗，佢當時唔明白電影嘅內容，只係覺得「好恐怖」，弱小心靈甚至留下創傷。7年之後，妹妹已經18歲，再睇返齣戲，佢明白到演出紅衣女孩，其實好值得驕傲。