唱K，都要留意外面發生咩事。喺1997年，寶勒巷一間卡拉OK發生縱火兇殺案。當年1月20日，兩個黑幫成員阿飛同阿輝喺卡拉OK消遣，因為無女相伴，咁啱見到個女侍應幾靚，居然出言調戲。個女侍應之後向經理投訴，經理就幫員工出頭，叫阿飛同阿輝「唔好搞事」，阿飛就好囂張咁話「我鍾意呀，關你X事！」個經理於是就叫負責睇場嘅另一黑幫出馬，結果阿飛同阿輝就被人打到頭破血流。

阿飛同阿輝離開卡拉OK之後，覺得條氣唔順，就搵大佬call馬諗住報復，原本就成班兄弟帶埋武器上門，但因為見到警察，有個兄弟就話，「不如擲個汽油彈嚇一嚇佢哋！」汽油彈極速燒着卡拉OK嘅地氈同電線，令火勢幾分鐘內就由2樓迅速蔓延至4樓。當時卡拉OK內音樂過大，再加上唔少客人飲醉咗酒，所以聽唔到火警鐘，唔少人未能及時逃生，結果造成17人死亡，當中大部分死者都係顧客。

警方之後確認咗7個涉案人士身份，阿飛喺98年被判終身監禁，而阿輝就一直著草，直至2008年12月，即係差唔多12年後先至喺深圳被捕，最後喺2010年判終身監禁。不過，至今仲有兩個行兇者未拉到，繼續被警方通緝。

圖片嚟自網絡。