太空，無數人折服於佢嘅浩瀚，亦有無數人希望探索佢嘅底蘊，揭開佢嘅神秘面紗。2003年10月15日，太空人楊利偉搭「神舟五號」飛船進入太空，成為中國首位踏足太空嘅太空人，亦為中國航天歷史寫下新篇章。

做太空人之前，楊利偉擁有1350小時駕駛殲擊機同強擊機嘅經驗，佢當年响1500個飛行員之中脫穎而出，同埋其他13個同伴，齊齊接受包括超重訓練等一連串挑戰。佢哋要响時速100公里嘅離心機內飛速旋轉，等如將八倍體重嘅重量壓落身上，面部會被拉到變形、眼前發黑、意識逐漸喪失，甚至會危機生命。頂唔順點算？有個緊急掣可以煞停，不過楊利偉無撳過，「戰勝唔到自己，如何征服太空？」
2003年，480噸嘅「神舟五號」載住楊利偉同埋430噸燃料奔向未知。加速上升時，火箭同飛船抖動，楊利偉嘅內臟產生共振，周圍猶如「有大鼓不停咁敲，五臟六腑好似要碎」，佢一度以為自己會死。經歷煎熬嘅26秒，飛船先飛出大氣層，陽光令楊利偉眨咗兩眨對眼，正式同太空say hello。佢响太空飛行14圈，歷時21小時23分，完成中國首次載人航天飛行。

回程時，快速飛行嘅飛船同大氣摩擦，高溫將窗外燒到紅曬，右邊窗甚至出現裂紋，情況好似強化玻璃被敲碎咗咁款。回到地球，返回艙着地之後彈返起，因為衝力大，搞到楊利偉被個咪整親嘴而流血。可幸嘅係，佢平安返到嚟。

透過改進技術，共振問題得到解決，之後嘅神舟六號已有改善，去到神州七號時，太空人幾乎已經感覺唔到振動。歷史嘅26秒，為更進一步嘅未來留下重要印記。
圖片嚟自網絡。