近排天氣開始轉涼，阿史身子弱，又病咗，史媽話聽日去余仁生買啲補品返嚟俾阿史補吓咁話。

講起余仁生，佢雖然係以賣中藥起家，但品牌嘅創立就同採礦場有關。話說余仁生嘅創辦人余廣（又名余廣培）生於江西，後嚟全家南下去咗佛山。喺余廣24歲果年，為咗生計，佢帶住一批中藥同祖傳嘅中藥知識離開佛山，同友人合作參與競投馬來西亞霹靂州嘅錫礦開採權，同埋鴉片、酒精、賭博、典當等嘅包稅權，從而賺咗第一桶金。就喺霹靂洲嘅採礦市鎮度，余廣發現當地唔少礦工都有吸食鴉片，於是余廣就運用中醫知識同中藥嚟減輕鴉片對礦工嘅毒害，效果仲唔錯添。後嚟，余廣喺1879年開設首間中藥鋪，取名「仁生」。仁代表「仁愛」，生代表「生命」，有「仁澤眾生」之意。

不過，真正將「仁生」發揚光大嘅喺余廣個仔余東旋。余廣38歲果年就因病離世，當時嘅余東旋先得13歲。之後，余廣嘅二房太太文氏，將余東旋由佛山接去檳城，俾佢接受西式教育，準備繼承家業，而當時嘅家族生意，就委託余廣嘅律師暫時託管。1890年，余東旋正式接管家族生意，將「仁生」改名做「余仁生」。但當時，由爸爸一手建立起嚟嘅家族生意，早就被爛賭嘅二叔敗得七七八八。余廣之前投得嘅包稅權優勢因政策變動，形同虛設，而錫礦都採到近乎枯竭，余東旋基本上要重頭開始。佢最後都係走返父親果條發家之路，從錫礦入手。佢重新搵礦源、開發新礦，到後來，橡膠業興起，佢又不斷用錫礦賺到嘅錢去投資發展橡膠業。無幾耐，余東旋就將生意網絡擴展到新加坡、香港同內地，余仁生喺佢嘅管理下逐漸發展成為東南亞最大中藥房，佢仲成為當時世界十大華人富商之一。之後，余東旋更將家族生意嘅總部由新加坡轉移到香港。

但自從余東旋過身之後，佢嘅財產平均分俾13個仔，導致余仁生股權分散，公司更被分成余仁生國際同余仁生香港兩部份。到後期唔少家族成員變賣家産，余仁生被其他公司收購，直到余東旋個孫余義明成立余仁生國際控股，先併購香港余仁生，重新將香港、馬來西亞同新加坡嘅業務合併重組，余仁生先再度歸余家所有。

圖為余廣、余東旋父子及余仁生舊店，圖片來自余仁生官網。