第二次英法聯軍於1860年入侵中國期間，英軍喺10月初湧到圓明園搶掠，18號更加响圓明園周圍放火，「萬園之園」由呢一日開始燒足三日三夜，無數珍寶被毀，淪為廢墟。根據記載，當時北京城上空日觀暗淡，猶如日食，而圓明園內，有三百個太監、宮女、工匠被圍困，葬身於火海之中。

至於英法聯軍當時點解要燒圓明園，大概有兩個主要嘅講法。第一個講法就係話，英法聯軍當時搶走大量財寶，聯軍為咗掩飾自己嘅行為，於是放火。而另一個講法，就係因為清廷拘禁以巴夏禮為首嘅39人談判使團，當中有21人被虐待致死，結果激嬲咗英法兩國，英國額爾金伯爵就認為當時使團嘅人係喺圓明園被虐待致死，所以堅持要火燒圓明園報復清廷，當時英軍貼出以下告示，公告火燒圓明園嘅決定：「宇宙之中，任何人物，無論其貴如帝王，既犯虛偽欺詐之罪，即不能逃脫其應有之責任與刑罰。茲為責罰清帝不守前約及違反和約起見，決於九月初五日焚燒圓明園，所有種種違約行動，人民未參與其間，決不加以傷害，惟於清室政府，不能不懲罰之也。」其實，都係藉口而已。