相信好多人都應該去過位於大埔嘅香港鐵路博物館，係，阿史認，今次係第一次去。

呢間香港鐵路博物館現時位置，其實係舊大埔墟火車站原址所在，舊大埔墟火車站勁呀，1984年已經被列為法定古蹟，即係基本上唔會有人拆佢；而呢度經修復後，早於1985年已經開放畀市民參觀。

由於已經開咗好耐，詳情阿史唔多講，但有兩件展品阿史覺得係不得不提嘅。第一件就係架「51號柴油電動機車」，睇返資料，原來51同52號兩架柴油電動機車，係香港首兩架柴油推動火車頭，51號車本身喺澳洲製造，稱為「葛量洪爵士號」，1955年正式運到香港，同年9月喺當時尖沙咀火車站舉行盛大命名儀式，因為呢一次係香港首次有火車頭用人名命名。

據講，呢個51號火車頭一直到1997年先全面退役，而九廣鐵路公司將佢復修後，喺2004年將成架車捐贈畀香港鐵路博物館永久收藏同公開展覽。

另一件阿史覺得幾有趣嘅展品，係館方鑲起咗1922年「廣九鐵路局」份年報，由於鑲起咗，阿史當然冇得摸佢，不過見佢收藏同保存得幾好，加上有接近100年歷史，所以都想特別推介畀大家睇睇。點都好啦，香港鐵路博物館真係值得一去，雖然地點唔算方便，阿史由今日大埔站行過去都用咗十幾廿分鐘……