最近有套由宇宙最強甄子丹做主角、王晶大導演執導嘅電影上畫，甄子丹响電影嘅角色伍世豪就係影射上世紀六七十年代本地大毒梟吳錫豪，故事劇情真真假假就唔多評論喇！之不過，上世紀五六七十年代，香港社會販賣同吸食毒品風氣盛行，呢個歷史背景王晶大導演响電影交代得相當清楚。

其實毒品問題早就响香港存在，响1945年以前，鴉片响社會係合法流通，甚至乎係政府其中一項重要稅收來源，直到戰後買賣同吸食鴉片先開始屬於違法。不過，二戰後香港嘅毒品問題就變得非常嚴重，仲成為其中一項棘手嘅社會問題。點解會咁呢？其中一個原因就係黑幫勢力介入。根據禁毒常務委員會資料指出，戰後大量難民由大陸逃至香港，當中就包括上海最大嘅犯罪集團「青幫」，迅即控制本港犯罪活動同毒品供應。「青幫」之後，就有本地嘅潮州幫興起取而代之。响七十年代之前，香港地下毒品市場由五至六個犯罪集團操控，毒品市場似乎主要由潮州各幫會操控。

其實响上世紀五六十年代，港英政府都有探討過點樣打擊毒品問題，但當時政府內部貪污風氣嚴重，執法部門包庇黃賭毒等活動，因此無乜成效，販毒及吸毒問題依舊嚴重，呢個情況直至七十年代先有所轉變。當時政府成立廉政公署，將包庇販毒集團嘅執法人員拘捕，藉此限制販毒集團再投資同行賄的機會。無咗執法人員嘅保護，警方毒品調查科就逐一拘捕販毒集團主腦，吳錫豪就係當時其中一人。佢响1974年被捕，1975年被法庭定罪並判入獄30年。

原圖來源：香港警務處