之前講過廣州白天鵝賓館創辦歷史、美心集團太子女於北京成立合資航空食品公司等，原來早過曬佢哋，已經有香港商人到內地投資，佢就係香港毛紡大王、港龍創辦人曹光彪。

曹光彪17歲嗰年接手爸爸嘅上海鴻祥呢絨店，當時間鋪資不抵債，加上競爭激烈，於是佢响營商作風作出大改革，同員工親力親為，並規定員工就算對住啲挑剔完一輪都唔買嘅顧客，都唔可以皺眉同嫌麻煩。顧客對間鋪留下好印象，自然會返轉頭，令店鋪嘅生意蒸蒸日上。

1954年，曹光彪响香港荃灣開辦太平毛紡廠，同時開拓國外嘅市場，甚至親自做推銷員。十年之後，佢收購超過十間針織廠，仲去到葡萄牙、南非、印度等地興建工廠，建造毛紡王國。

七十年代後期，剛剛經歷文革嘅內地對外資而言，可謂重門深鎖。曹光彪有次約咗中國紡織品進出口公司總經理陳誠宗响北京食飯，就提出到內地設廠，曹光彪仲主動寫信同中央溝通，得到鄧小平等領導層嘅支持。

曹光彪煞停原本响澳門開廠嘅計劃，於1978年揼本幾百萬美元去珠海開設香洲毛紡廠，原材料來自海外，而產品就由曹光彪嘅永新企業包銷。原本預期需要五年時間年回本，點知最後只係用咗兩年就達標。

當中有一件比較特別嘅事，就係1979年11月毛紡廠揭幕，曹光彪廣發請柬，邀請工商界名人、外國駐港領事、中外記者等出席儀式。不過當時內地經過文革衝擊，令到大批外賓嘅簽證成為一大難題。為咗解決問題，曹光彪派嗰女去廣州，搵當時嘅廣州省省長楊尚昆。楊尚昆好乾脆，佢認為香洲毛紡廠係當時嘅創舉，所以入境嘅外國賓客只要交低護照，出境時拎返，就可以到珠海參加開幕禮。

香洲毛紡廠係中國第一間港商投資嘅中外合資企業，於推動內地積極引進外資方面開創先河，而曹光彪就成為文革後，打開中國投資大門嘅第一人。

圖片嚟自網絡。