阿史雖然唔係話好中意飲啤酒，但間唔中睇波或者吹水聚會都會同班死黨買打生力啤啤佢，貪佢果陣苦澀味。幾個月前，生力仲出咗「香港生力70周年18區限定罐」，罐上面印有唔同區嘅標誌建築，都畫得幾靚吓。

生力啤酒曾經係唯一一間喺香港自設大型啤酒廠嘅啤酒品牌，1890 年喺菲律賓成立，品牌名稱有「生龍活虎，精力充沛」嘅意思。生力自1914年起由菲律賓出口啤酒到香港，之後喺1948年响深井起香港啤酒廠，同年5月開始賣樽裝啤酒，首年銷量達到4000百升（1百升=100升），而罐裝嘅生力啤就要等到1967年先由菲律賓入口。後嚟，生力嘅主要生產線搬咗去元朗工業邨山貝河畔，而深井酒廠喺1996年停產。

不過90年代後期香港啤酒市場持續萎縮，加上本地生產嘅成本上漲，啤酒廠嘅利潤連續多年下降，所以生力嘅董事會喺2007年將酒廠搬去順德。停產後嘅元朗酒廠只係用作貨倉同包裝用途，令生力唔再Made in Hong Kong。後嚟，財爺曾俊華喺2008至2009香港財政預算案度宣布，酒精濃度不多於30%嘅酒類免稅，又重新刺激香港嘅酒類市場。於是，生力响2009年初重開元朗酒廠生產線。香港市民又可以飲到Made in Hong Kong嘅新鮮啤酒喇。雖然嗰品牌源自菲律賓，不過一直以嚟香港人都當生力係本地啤，飲開有感情。

而對於唔好啤酒嘅人嚟講，生力啤酒最深刻嘅係佢強大明星廣告陣容，梁家輝、舒淇、周星馳、李連杰等紅星都有拍過生力嘅廣告，大家有興趣不妨搵返啲舊片嚟回味吓。