公共屋邨都有文物徑？無錯！呢條文物徑就係响舊年重建完成第一期嘅蘇屋邨。

蘇屋邨係香港最早期嘅大型公共屋邨之一，1955年開始興建，1963年整個屋邨正式完成，歷時約八年，提供5 000多個租住單位，成為咗唔少基層市民嘅安樂窩。而且，唔少歌星同藝人都住過蘇屋邨，好似許冠文、許冠英、許冠傑、黃家駒、黃家強、蔡楓華、伍衛國、蔡少芬、謝天華、周啟生、林嘉華等。响2006年，房委會決定將屋邨分兩期清拆重建。


現時重建工程已經完成第一期，舊年已經入伙，而今次重建房委會就保留舊蘇屋邨嘅「三寶」，分別係白屋仔、燕子亭同金漆大門牌。阿史早兩日就去咗蘇屋邨行個圈，照咗幾張相。不過呢，金漆大門牌好似仲未安置好，而原來準備變成便利店嘅白屋仔亦未乜嘢動靜，仲係吉屋一間，而弧形涼亭燕子亭就有幅大型壁畫，感覺都相當唔錯。