大家仲記唔記得綠葉王羅君左？佢喺2010年11月13日因為突發性心臟病逝世，終年51歲。

羅君左最初喺1979年加入香港電台廣播劇組，聲演廣播劇《沈勝衣》、《白馬王子》等。兩年後佢加入TVB，喺處境劇《香港八一》入面飾演斌仔一角，深入民心，自此唔少人都會叫佢做「斌仔」。羅君左之後喺1986年參與咗《歡樂今宵》，曾經扮過肥姐沈殿霞，似模似樣，最後兩個人因為咁成為好友。羅君左參演過TVB無數劇集，成為一代綠葉王。

除咗沈殿霞，唔少圈中人都係羅君左好朋友，1987年佢屋企經歷巨變，媽媽同哥哥先後離世。梅艷芳當時二話不說，開咗一張無銀碼嘅支票俾羅君左救急，後嚟羅君回憶返，話梅艷芳曾經講過「如果你唔填銀碼上去嘅話就同你反面」，果然係義氣仔女。

羅君左逝世前受糖尿病病魔煎熬，腎同心臟都出現問題，2009年更受糖尿病同細菌感染影響，要切除右邊小腿，不過佢無放棄到，相信「失去一條腿並非失去全世界」，意志堅毅。佢逝世之後，保險金捐咗俾梅艷芳慈善基金，遺愛人間。

圖片嚟自網絡。