第一次世界大戰入面，除咗之前講過嘅索姆河戰役外，造成傷亡慘重嘅仲包括凡爾登戰役，喺呢場戰役之中，德法兩國共有超過25萬名士兵喪命，另外有50多萬名士兵受傷，傷亡人數僅次於索姆河戰役，所以凡爾登戰役仲有個別稱——「凡爾登絞肉機」。

法國凡爾登本身係通往巴黎嘅重要據點，亦都係法軍一個重要樞紐。德軍喺1916年初，諗住全面擊敗法國，於是就計劃進攻凡爾登，德軍除咗視呢場戰役為陣地戰，亦都視為消耗戰，希望透過呢場戰役消耗同殲滅法國主要軍力。

德軍喺呢場戰役中採用咗噴火器、毒氣彈同超大口徑火炮等新型武器，而法軍呢邊都唔弱，用咗輕機槍和400毫米超級重炮，結果兩邊軍隊互相發射咗4000萬發炮彈，最終雙方各有10幾萬士兵陣亡。法軍喺1916年12月18號擊退德軍，保住凡爾登，而德軍佔據凡爾登唔成功之餘，原本諗住消耗法軍兵力嘅如意算盤亦都打唔響，自己亦都損失大量兵力。當時協約國就係因為索姆河同凡爾登兩場戰役而扭轉局勢，德軍嘅形勢亦由盛轉衰。

去到今時今日，凡爾登仲有部份地區埋藏住戰時炸彈。戰爭嘅禍害，並未因為時間而終止。

原圖嚟自網絡。