如何駕馭王侯將相嘅氣勢，又對反派奸角嘅深沉城府收放自如？其實依啲都係考驗一個演員嘅功架同實力。上次提到呂頌賢版嘅《笑傲江湖》，唔少史友都對套電視劇印象深刻，今日同大家重溫經典角色之一岳不群。飾演岳不群嘅王偉無論表情定心理變化，都演繹得非常有層次，簡單而言就係好戲。

王偉家境富裕，爸爸做塑膠廠同海味生意，原本被安排接手家族生意，不過王偉中意做戲，中學畢業後投身演藝圈，拍攝粵語片。同王偉同時期嘅演員有謝賢、南紅、周聰等，佢1967年仲同四哥謝賢拍過電影《英雄本色》。

七八十年代王偉分別同亞視及無線簽約，拍咗大量膾炙人口嘅電視劇，好似ATV時代《秦始皇》嘅呂不韋、無線嘅《刑事偵緝檔案II》、《離島特警》、《美味情緣》、《封神榜》、《尋秦記》等，真係數都數唔完。特別嘅係，原來王偉拍過好多金庸作品，例如《書劍》、《射雕》、《天龍八部》、《鹿鼎記》、《碧血劍》等都可以搵到佢嘅身影。當中《笑傲江湖》嘅岳不群完全騷到王偉嘅精彩演技，由初期嘅謙謙君子，到練咗《葵花寶典》後流露出女人神態嘅嗰種不經意，演繹出偽君子嘅真面目。

可惜嘅係，王偉於七年前嘅今日病逝，大家只能响電視機入面重溫佢嘅精彩演技，同埋各個經典角色。

劇照嚟自網絡。