砌生豬肉係「中西合璧」？

阿史近排覺得有啲委屈，係咁被同事砌生豬肉，話阿史同秘書妹妹有路，真係冤枉呀。點解砌生豬肉會用嚟形容老屈、蓄意誣告？

話說喺香港50年代果陣，中英文夾雜嘅情況已經好常見。「charge」係警局常用字，解落實控告，而「砌」字有捏造嘅意思，所以「砌charge」就係捏造假證據誣告咁解。由於舊時貪污風氣盛，ICAC又未成立，警察局有好多警察收受賄賂，放過真正犯案嘅人，再誣告唔相關嘅人嚟突出自己嘅表現，呢種行為就叫做「砌charge」喇。又因為當時警局入面嘅師爺英文水平參差，將英文「charge」直接音譯，譯成「差廚」。

但唔知點解後尾以訛傳訛，就傳成「生豬」，有人見「生豬」出現就係後面加多個「肉」字，讀起上嚟就更加生動有趣。砌生豬肉讀起上嚟就有趣喇，不過就千其唔好做，唔係會好容易對當事人嘅心靈造成創傷㗎。