喺香港60年代，當時酒店業界仲係外國人嘅天下，酒店嘅甜品師傅通常都係嚟自英國、法國嘅大師。直至70年代，先開始有華人師傅坐上「一哥」之位，其中一位師傅就係黃錦興。

黃錦興係西餅界嘅大師級人馬，澳門賭王何鴻燊、已故全國政協副主席霍英東等名人都係佢嘅常客，行內人都尊稱黃錦興一聲「興叔」。黃錦興由1956年喺餅家咀香園做學徒開始，學習製造各式各樣嘅唐餅，兩年後去半島酒店繼續做學徒。喺半島學師果陣，黃錦興經常被外國總廚鬧，佢一邊學好英文同外國師傅溝通，一邊努力學整西式甜品。學咗足足13年，黃錦興升到文華酒店嘅總餅師，成為該酒店首位華人西餅行政總廚。酒店仲特登派佢去瑞士深造，原本係去學師，點知當地廚師嘅手藝都唔及黃錦興，反而變成係黃錦興教返佢哋轉頭。

80年代，黃錦興先後受聘於北京長城酒店同北京喜來登長城飯店，曾經為鄧小平、趙紫陽等政要製作生日蛋糕同甜品。報道話，鄧小平中意食朱古力慕斯同瑞士蘋果撻，而趙紫陽就中意加咗薄荷酒嘅松露朱古力。黃錦興回憶話，以前啱啱返內地果陣，見到當地人做出嚟嘅麵包都係硬梆梆嘅，連最基本嘅發酵粉都無。後嚟佢逐漸將技術改良，仲收咗內地一班勤力、肯俾心機學嘅年輕人做徒弟，宜家呢班徒弟都已經係各大酒店獨當一面嘅餅師。

黃錦興雖然退休多年，但仍活躍喺餅界，除咗2002年曾經喺黃大仙騰龍墟整餅擺檔之外，近年仲同另一位餅界師傅金子全坐鎮曲奇餅店，依然功架十足。 圖為興叔早年到瑞士學廚以及到內地工作。

圖片來源：香港工聯會