阿史記得之前有一位風靡萬千少女嘅丹麥王子尼古拉出道成為模特兒，有報道仲提到佢原來係港產王妃文雅麗（Alexandra Manley）個仔添。相信年輕史友都未必對文雅麗有印象，不如今次就講下啦。

文雅麗本身係一名混血兒，有1/4中國血統，爸爸係英中混血兒、媽媽就有波蘭同奧地利血統。文雅麗1964年喺香港出世，小學就讀鰂魚涌英童小學同己連拿小學，而中學就喺港島英童學校讀書，可以話係一個土生土長嘅香港人。中學畢業之後，文雅麗就去咗奧地利讀國際商貿，之後又去過日本同英國進修。畢業返到香港，佢先後喺花旗銀行及怡富集團香港分部任職證券經紀，其後再去到GT管理（亞洲）有限公司任職，仲做埋公司副總裁添。

喺1994年，文雅麗喺私人宴會上識咗嚟香港實習嘅丹麥約阿基姆王子，二人好快就墮入愛河，5個月後約阿基姆王子就向文雅麗求婚，轟動一時。1995年11月18日，二人喺丹麥舉行婚禮，文雅麗迅速融入新生活，佢唔駛100日就學識咗丹麥語，幾年之內就已經無晒口音。婚後嘅文雅麗熱心公益，出任丹麥紅十字青年團、丹麥視障人士協會、動物基金會等多個公職，當時更被譽為「北歐戴安娜王妃」，深受丹麥民眾愛戴，佢仲生咗尼古拉同菲利克斯兩位王子。

不過結咗婚未夠10年，童話幻滅，王室宣布約阿基姆王子同文雅麗離婚，當時外界估計係因為文雅麗熱心公益，但約阿基姆王子就熱衷派對同賽車，導致二人性格不合分開，亦有傳係約阿基姆王子縱情酒色所致。離婚之後，丹麥女王將文雅麗冊封做腓特烈堡伯爵，確保佢唔會因為再婚而失去貴族身份，每年亦可以獲發190萬克朗（約220幾萬港元）的王室津貼，丹麥王室都算係唔話得。到咗2007年，文雅麗就同比自己後生14歲嘅攝影師約恩森結婚，不過8年之後文雅麗就再度離婚，回復自由身。

圖片嚟自網絡。