銅鑼灣每日都會鳴炮？响每日中午十二點，怡東酒店對開嘅海邊，都會鳴放一響午炮，其實依項傳統歷史悠久，相傳係同怡和洋行被懲罰嘅故事有關，而今日嘅景隆街，據講就係為紀念當初炮台位置而命名嘅。

好多年前，銅鑼灣一帶海邊用嚟做貨倉同碼頭，而怡和就設立炮台以防範海盜。後嚟怡和洋行擁有禮炮同衛戍隊，每次老細，即係大班離開或者抵達香港，都會鳴炮示意Goodbye或者Welcome。相傳响1841年某一日，怡和因為大班而鳴放禮炮，點知畀一個嚟香港無幾耐嘅英國高級海軍軍官聽到，佢認為商家無資格用禮炮，既然怡和中意鳴炮，就罰佢哋日日鳴炮。

不過，依家支炮已經唔係當初支3呎長嘅炮喇。最開初支炮响日佔時期失咗蹤，抗戰勝利之後，英國海軍就送咗支大炮過怡和，仲可以發射6磅重炮彈添。點知後嚟居民投訴發炮嘭嘭聲太嘈，水警就沒收咗支炮，變成現今大家所見，只能發射3磅重炮彈嘅速射炮。

除咗日佔時期一度中止外，鳴放午炮嘅傳統一直持續至今，成170多年歷史架。唔單止每日中午，元旦前夕都會鳴放「子夜禮炮」，寓意送舊迎新。

至於連接告士打道同駱克道嘅景隆街，原來歷史在細節，英文係Cannon Street嘅Cannon，中文正正就係大炮咁解，命名原因相信係同銅鑼灣當時附近嘅小島「燈籠洲」嘅炮台有關。