熱帶風暴貝碧嘉纏住香港好幾日，搞到阿史無論返工定出街都要帶住把大遮，有一兩次仲搞到對腳濕曬，真係多得佢唔少。雖然貝碧嘉目前仲係「三號仔」，但颱風嘅威力絕對唔可以睇小。歷來有唔少颱風對香港造成嚴重破壞，導致人命同財物傷亡，好似多年前嘅溫黛同露絲咁，更加係香港史上破壞力最強嘅颱風之二。

講返少少歷史，香港1884年設立咗風暴警告信號，初初嘅目的係為咗方便啲海員。戰後，天文台於五六十年代引入天氣雷達同氣象衛星接收系統，用嚟監測颱風。香港舊時仲有二號、四號、五號、六號同七號風球，不過响1973年開始，就變依家使用嘅風球信號系統喇。

1962年溫黛襲港，德輔道中有建築部件冧咗，打橫阻住成條路。段片入面嘅最後一張圖片，係當年打風，有艘大漁船被沖上岸，停咗响沙田戲院門口，可以見到溫黛嘅破壞力有幾勁。而1971年嘅超強颱風露絲，就吹冧唔少招牌同樹木，更加有大型船隻被吹上岸擱淺損毀。

隨住科技進步，預測風暴嘅能力已經有所提高。如果大家對天文台發展歷史同舊時嘅颱風照片有興趣，可以去歷史檔案大樓，參觀「百年風雲：檔案裡的天文台故事」展覽。最後，阿史真係好想問，貝碧嘉究竟幾時同大家講拜拜？